عييتي من تنظيف عيون البوتاجاز ... أجي نوريك حل ساهل وعبقري :)

جبت ليكوم واحد الحل لي يهنيكوم من مشاكل تنظيف عيون البوتاجاز،خاصة لي عندهوم ديال النحاس ،هما فعلا كيجيووا رائعين بعد التنظيف بالحامض مثلا ولكن دغيا كيتبدل لونهوم .

1)اول خطوة هي تنظيف العيون جيدا
باش اتغلفو وهما نقيين ،ولي عنها ريوس ديال النحاس تجرب هاد الطريقة فالتنظيف كيخرجو كيشعلو
شعليهوم عادي وخليهوم حتى اسخنوا مزيان طفيهوم
هزي غي الراس بشي حاجة انا كندخل شوكة ديال الفرشيطة فالثقب ونهزهوم لفوق البوطاجي
خذي نصف حامضة وبداي تحكيهوم مع الظغط الجيد
ماتخافيش واخا يبان ليك الدخان والحامضة كتلصق غي كملي راه داكشي الكحل كلو كيتحيد وكيرجع لونهوم كما كان
2)غلفيهوم بالالمنيوم الراس والقاعدة ديالو
هاهما مغلفين بجوج القاعدة صافي تهنينا منها كيبقى الراس خاصو شوية دالتحضيرات باش تبقى العافية ديالو مضبوطة كما كانت قبل التغلاف
3) كنشدو عود اسنان اكون غليظ حسب الثقوب لي عندنا ونبداو نثقبو الورق عند كل ثقب موجود فالراس وكاينين حتى شي ثقيبات صغار
لتحت ديرو لهوم نفس الشيئ
4)نرجعو الراس فوق القاعدة ديالو ونردوه للبوطة ونشعلوه ،الى بان ليكوم اي ثقب ماكتخرجش منو العافية بشكل جيد يكفي تسرحيه و هو شاعل بشي سلك غليظ حتى تقاد
وهاهي النتيجة ،والجميل فالامر انهم كيسهالو حتى فالتنظيف ،ملي اكونوا سخان حكوا البقع والاوساخ بشي ثوب وكلشي كيتحيد بسهولة ،نتمنى اي اخت ستافدات من الموضوع دعوة في ظهر الغيب ..